एसडी मुनीले सुशील कोइरालाको धज्जी उडाए

२८ जेठ, काठमाडौं । आफूलाई नेपाल मामिलाको विज्ञ दाबी गर्ने भारतीय चर्चित प्राध्यापक एसडी मुनीले नेपालका प्रधानमन्त्री सुशील कोइरालाले सार्क सम्मेलन आयोजना गर्न चीनको सहयोग मागेको भन्दै प्रधानमन्त्री कोइराला र नेपालको मानमर्दन गर्ने प्रयास गरेका छन् । जवाहरलाल नेहरु युनिभर्सिटीका प्राध्यापक मुनीले बुधवार नेपाल मामिलामा टिप्पणी गर्दै सुशील कोइरालाले नचाहिने काम गरेको आरोप लगाएका छन् । मुनी अंग्रेजीमा लेख्छन् ‘सार्क सम्मेलन आयोजना गर्न चीनको सहयोग मागेर सुशील कोइरालाले बेतुकको काम गरेका छन्, यसले नेपालको आत्मसम्मान र सामथ्र्यको अपमान गर्छ’ ।

नेपाल मामिलामा चासो राख्ने प्राध्यापक मुनीले सार्क सम्मेलन आयोजना गर्न कोइरालाले चीनको सहयोग मागेको भनेर ट्वीट गरे पनि वास्तविकता त्यस्तो नभएको प्रधानमन्त्री कार्यालय स्रोतले जनाएको छ । हालैको चीन भ्रमणका क्रममा प्रधानमन्त्रीसमक्ष चीनिया पक्षले सार्क सम्मेलन आयोजनाका लागि भौतिक र अन्य के सहयोग आवश्यक पर्छ, त्यसमा सहयोग गर्ने प्रतिबद्धता जनाएको थियो ।

नरेन्द्र मोदी ताइवानसँग नजिकिएको दाबी
मुनीले कोइरालाको धज्जी उडाएलगत्तै चीन मामिलामै थपेर अर्को ट्वीट गरेका छन् । एकातिर उनले चीनसँग कोइरालाले हात फैलाएर गलत काम गरेको आरोप लगाएका छन् भने अर्कोतिर चीनलाई नरेन्द्र मोदीले कडा संकेत दिएको टिप्पणी गरेका छन् । नरेन्द्र मोदीको सपथ-ग्रहणमा तिब्बतको निर्वासित सरकारका प्रधानमन्त्री र ताइवानका व्यापार प्रतिनिधिलाई उपस्थित गराएर चीनलाई कडा संकेत दिएको र चीन उपयुक्त जवाफको खोजीमा रहेको मुनीले छुद्र टिप्पणी गरेका छन् ।

Labels: News